文｜鄭晴
「邊度跌倒，就喺邊度起返身！」仲記得，上年食物及衛生局局長高永文參加北區賽跑活動嘅時候，閃避一名跌倒小朋友而仆倒，搞到血流披面，事後仲要停工兩星期。尋日高醫生又重返舊地，比賽前仲講笑話「有啲緊張」，幸好最後都順利完成賽事！
話說高醫生上年，起跑唔夠10秒之後，因為想避開前面跌倒嘅小朋友，自己就反而仆倒，今次高醫生重返舊地，而最戲劇性嘅係，撞返上年絆倒佢嘅小朋友。難得有緣重遇，高醫生仲主動去同個小朋友握手、寒暄，仲讚對方「高咗好多」。
高醫生致辭時，更主動重提去年跌倒事件，話好高興再出席呢項活動，又強調自己基本上已經康復，仲以過來人身份提醒參加者小心。今年佢再挑戰兩公里賽事，又講笑話「有啲緊張」，仲趁機感激舊年受傷之後，各方嘅關心。高醫生今年誓要「爬返起身」，堅持再參加，話活動有益，終於成功完成賽事，認真可喜可賀！
