大公網12月1日訊 立法會今日續會，一早繼續討論周浩鼎（Holden）提出的打擊「假難民」議案，促請政府有關當局盡快研究解決方法。民建聯嘅蔣麗芸（Ann姐)發言話，反對派成日話「假難民」令少數族裔人士被歧視，佢地唔會鍾意咁，不過Ann姐就話，幾年前第一宗搵佢地協助嘅「假難民」問題，原來就係南亞裔人士求助！

　　Ann姐話，因為有南亞裔人士嚟到香港之後無錢，打電話問香港本地嘅南亞裔同鄉，「攞住幾萬蚊嚟使嚇先，我知道你啲仔女住邊度，我知道你鋪頭喺邊度，我知道你父母喺鄉下邊度。」假如唔就範就可能會斬人，所以之前先出現咁多南亞人斬南亞人嘅事件。Ann姐之後話，有部分人犯左事出嚟之後，有高明嘅律師教佢地申請酷刑聲請，等佢地可以多則十年八年唔洗離開香港。法律界郭榮鏗之後一發言就投訴，話要有證有據先好話法律界人士教唆，大部分法律界人士都係真心想幫真難民喎。

　　陳克勤之後發言回應，佢引用報道指有難民一落機就有法律界朋友等佢地，幫佢地做酷刑聲請，又引述報道指，有法官質疑律師行包攬訴訟，證明法律界內真係有害群之馬。Holden最後都有發言，回應泛民話聲請者人數有下跌，問題唔嚴重喎。Holden就解釋，民建聯一直促請政府加快處理問題，人數先有下降，反問以泛民嘅邏輯一直覺得無問題唔作為，人數又點會跌呢？

　　可惜，議案最後喺分組點票嘅地方選區投票以16票對16票打成平手而被否決，大家傾咗成日，到最後又過唔到關喇。