民主黨新任總幹事蔡雨龍
喪失議席嘅青年新政游蕙禎早排居然寫信畀台灣嘅蔡英文要求對方收回新界,再一次貽笑大方。不過,如果換作民主黨新任總幹事蔡雨龍嘅話,直頭連信都唔使寫。點解?因為蔡雨龍家族同台灣甚有淵源,不止老婆是「台妹」,其堂哥更是台灣民進黨黨員兼 「立法院」副院長蔡其昌添!唔通……今次白鴿黨招募蔡雨龍做總幹事,目的係想靠攏民進黨,支持 「台獨」?
曾經喺大銀行擔任高級副總裁嘅蔡雨龍尋日自爆,佢父系親戚同老婆都係台灣人,成家親戚都喺台灣;但聲稱自己好少同堂哥蔡其昌聯絡, 「都係過時過節先打電話」,而老婆家人仲係親藍營嘅 「台灣公務員」。佢話,自己放棄高薪厚職走嚟做 「白鴿黨」打雜,並唔係想個黨同民進黨合作搞 「台獨」。蔡雨龍仲煞有介事咁表明自己絕無外國國籍,兼反對 「港獨」同 「台獨」,又反問記者 「支持 『台獨』有咩好處先?不如你話我知。」
佢又講,到上任後想擴大民主黨黨校規模,吸納更多年輕人做 「乳鴿」出戰區選,又自言 「N屆不選」。之不過,政治嘅嘢never say never囉,你睇嚇上任總幹事林卓廷就知啦。