梁頌恆（右）最近身邊又多咗一位異性朋友，梁生嘅生活真係多彩多姿，啲花生都就快斷市 大公報調查組

       文 | 鄭晴

　　大家一定仲記得本報早前踢爆青年新政梁頌恆和游蕙禎這對親密戰友，喺灣仔私竇過夜嘅新聞，花生友請留意，鄭晴聽講，呢齣"Sixtus in the House, Reginein the House"嘅梁游CP 「狗血言情劇」，劇情有最新進展！

　　話說本報也揭露了游蕙禎在釋法日秘密赴台，之後返港後頻往銀行，更找來 「港獨」組織 「香港人優先」嘅張漢賢做 「柴可夫」。通篇報道都無講梁頌恆同張漢賢嘅關係，但梁頌恆後來莫名其妙地在facebook急急澄清，話唔識張漢賢，令到好多人都愕然。鄭晴就聽講，其實梁、游係因為呢件事產生矛盾，具體內情我哋就唔知喇，但表面睇嚟，兩人關係的確有咗微妙變化。

　　梁頌恆返「鄉下」鴨脷洲過夜

　　鄭晴嘅調查組同事就發現，梁、游之前豪租嘅灣仔私竇，呢排三晚有兩晚都烏燈黑火，擁有 「鴨脷洲口音」嘅梁頌恆就多咗返鴨脷洲屋企過夜。有次本土民主前線嗰個黃台仰，車埋梁、游同 「本民前」成員李東昇一齊去 「本民前」嘅新竇─位於火炭嘅某工業大廈，結果李陪梁一齊上樓開咪，游就自己走咗去搭火車。其實，梁、游兩人如今夜晚經常分頭行動，有人就傳佢哋已經分居！咁呢次真係 「梁游已完」喇！講開又講，梁頌恆最近身邊又多咗一位異性朋友，雖然兩人喺公開場合無乜親密行為，但就好曖昧咁話。呢個女仔都識游蕙禎，係佢哋圈子中人添。哎呀，究竟梁頌恆係唔係咁快就已經另結新歡呢？一地花生殼啊！