青年新政梁頌恆同游蕙禎失去議員資格，大家最關心莫過於兩人「老笠」嗰186萬元薪津去向，更加關心兩人為打官司已花光所有公帑，面臨破產，無法「回水」。葉謝鄧律師行高級合夥人謝連忠日前就喺Facebook發文，竟然話自己要免費幫梁游申請破產，話：「我依家擺明抽水架（㗎）嘞，如果梁游要申請破產，我免費幫佢哋做。我啲（嘅）目的，係令政府一個仙都收唔到。在破產前，同政府撐到痕（行），打到底，輸咗上訴。」講到信誓旦旦咁，但事隔第二日竟然敢講唔敢認，仲光速刪Post？不少網民都批評佢簡直係是非不分，仲質疑他涉嫌教人走數，有違律師專業操守，話要去香港律師會投訴佢囉。
其實呢位謝連忠的Fb上，經常語出驚人，例如聲稱人大釋法是「插手香港事務」，鄭晴覺得需要幫呢位律師「法普」下─「本法的解釋權屬於全國人民代表大會常務委員會」，基本法第158條寫得好清楚㗎。
