圖：BEN（圖）同柯仔都不約而同收到類似「港獨」信件

　　「港獨」分子「勾獨」成癮不止，仲寫埋信「恐嚇」建制派？繼早前民建聯立法會議員葛珮帆（EQ）收到封寫有「香港國」字眼嘅信件，民建聯議員陳恒鑌（BEN）、柯創盛（柯仔）竟然都不約而同收到類似信件喎！封信除咗繼續用「支那」等侮辱性言語之外，仲要求佢哋同游蕙禎、梁頌恆道歉，唔係會發動二次侵華咁話。

　　阿Ben同柯仔尋日都話，收到由日本寄至「『香港國』立法會綜合大樓」嘅信件，署名組織為「Sino-Japon Society of National Friendship」，而寄件人「不破金武科」則自稱會長。不過鄭晴查過，網上似乎無呢個組織嘅資料，十分神秘。

　　信中除左大力支持「港獨」分子，仲形容Ben同柯仔係「親支那議員」，威脅話如果唔將游梁留低，日本將會再度侵略「支那政權」。Ben收到之後得啖笑，思疑係「港獨」分子扮日本組織寄信畀佢哋，但指封信涉嫌恐嚇，覺得應該要調查下日本係咪有組織與「港獨」分子勾結，如有機會見到日本駐港領事，亦會問下信中日本地址真偽。

　　至於柯仔就相信，任何中國人睇到呢封信都會好憤怒，更會感到滑稽。佢好嬲咁話，唔好以為中國人好欺負，講到明唔驚呢啲一派胡言！柯仔更加對發信者作出最強烈譴責，又對香港郵政竟接納以「香港國」為寄信地址嘅信件，感到強烈不滿。