圖：李慧琼叫大家一齊選年度漢字，仲有機會贏巨獎 網上圖片
民建聯近日舉行香港年度漢字評選2016，主席李慧琼喺網上社交平台公布十個候選嘅漢字，包括「理、智、禮、思、同、安、穩、創、機、亂」。評選嘅公眾投票已經開始咗，有香港身份證嘅市民只要登入www.coy.dab.org.hk或者去民建聯總部、各區支部或者各議員辦事處，索取及遞交投票表格就可以投票。
如果你揀中咗年度漢字，仲有機會參加抽獎，民建聯準備嘅13份獎品包括亞洲雙人來回機票、專業單鏡反光數碼相機連鏡頭套裝及香港來回北京機票等等，真正係有獎抽、有票投㗎！投票由而家起去到下個月20日截止，下個月29日就會公布結果喇。
今次民建聯選出嘅十個漢字可以講係字字珠璣，大部分都係一啲有和平、安穩意義呢啲屬於香港人核心價值嘅字，相信愛好和平嘅香港市民都能夠揀出最能代表佢地所想嘅字，或者將對香港嘅期盼喺選票當中表達出嚟。不過眼利嘅讀者可能都見到，十個字嘅最後係一個「亂」字，過去一年嘅年初一旺角暴亂、「港獨」議員喺議會搞搞震，睇怕都有唔少市民會揀呢個字代表2016年嘅香港喇。
