文｜鄭晴

　　青年新政梁頌恆、游蕙禎被取消資格（DQ），盟友「本民前」黃台仰閃咗去邊？咪去咗台灣勾結「台獨」，之後咪繼續匿埋喺網台囉！唔通真係同佢哋「寧為玉碎」咩！

　　黃台仰前日喺網台主持節目，有網友問佢點解「本民前」呢期好似失曬蹤，黃台仰就話：「我哋唔係唔想搞，我哋而家無……無領袖，無足夠嘅機會可以再畀我哋去發起類似唔同其他嘅行動」，佢又話，自己同梁天琦有官司在身，再搞就違反保釋條件，「咁所以現階段我哋未有適合嘅人走出嚟帶領街頭抗爭運動，咁我哋而家其實係培訓緊，希望好快會有新嘅『本民前』第二梯隊出現。」

　　鄭晴聽到黃台仰咁講，真係笑咗！無腰骨就無腰骨啦，之前又話組織無領袖，所有行動都係自發，而家就話因為無人做到領袖，所以唔發起行動，係咪好矛盾呢？佢玩曬啦！怕且係佢見到無曬利益，Plan B都被人DQ，跟住就藉口有官司喺身，退居幕後訓練第二梯隊。喂阿哥，講到尾就係想搵爛頭蟀啦！精人出口，笨人出手。不過鄭晴睇得通透，稱呼黃台仰係「精人」就真係太抬舉佢，招攬「笨人」就真！

　　仲搞「港獨」？ 唔好咁天真

　　講咗咁耐，連「港獨國師」陳雲都要拋西瓜搵佢嘅西瓜琦，又閃咗去邊呢？咪就係喺加拿大深潛囉！不過，佢十二月初就會閃返香港出席一啲講座。黃台仰仲幫佢解畫：「梁天琦，佢其實會讀書啦，讀書嘅重要性，我諗都唔需要講，而且佢亦都去咗加拿大，佢亦都會去同唔同嘅人會面，跟住會做一啲民間外交。」咁低水平嘅狡辯，收唔收貨先？眼見兩人一個龜縮，一個就喺外國風流快活，如果有年輕人仍然跟佢哋搞「港獨」，鄭晴不禁要勸一句，唔好咁天真啦！