文｜鄭晴
警隊每逢年底都會派發俗稱「聖誕禮物」嘅「Yes Letter」，提拔警官晉身管理層，而今年嘅升職名單特別受注視，事關目前懸空嘅「行動處處長」一職，升任呢個職位嘅助理處長，將視為下任「一哥」大熱門。鄭晴從警隊內部不同渠道得知，港島總區指揮官郭蔭庶（Oscar）及助理處長（人事）鄧炳強（Chris）兩位阿Sir「叮噹馬頭」，結果下個月就會揭曉。
鄭晴又聽聞，前年「佔中」每日主持記者會嘅「四點鐘許Sir」許鎮德，今次都榜上有名，恭喜曬許Sir！據了解，有四位總警司將會晉身管理層，呼聲最高嘅除咗現任深水埗警區指揮官嘅許Sir之外，仲有人力資源科總警司蕭澤頤、刑事總部總警司何婉霞、保安部總警司鍾仕邦。
