文｜鄭晴

　　立法會議員劉小麗上任之後頻頻鬧出笑話，唔單止成日喺發言時問埋啲同議程無關嘅事，有時更加連票都唔識投。尋日佢喺發展事務委員會上又嚟料，出手干預埋十八區區議會事務，話各區區議會嘅小型工程效率好低，又話要將大埔同觀塘區議會一億元重點工程重推，擺落地區諮詢再至少五次。呢啲「傻迫」言論，連民建聯立法會議員劉國勳（Edward）都睇唔過眼當場反駁，話劉小麗咁樣插手區議會事務，簡直係矮化區議會職能，質疑佢其實係想將「拉布」文化擺入區議會！

　　Edward講，查實兩個區議會重點工程，上屆係因反對派「拉布」先拖垮，家嚇再諮詢五次，直情係想將「拉布」戰場移到區議會。佢好嬲咁話，「喺反對派『拉布』嘅時候，區議會正正喺前線發揮緊做實事為民服務角色，好多小型工程都係實實在在幫緊市民！佢咁樣講簡直係矮化區議會，同現實不符。」

　　區議員鬧爆 唔識區會事務

　　而小麗狂言一出，Edward亦即刻收到好多區議員WhatsApp信息，個個都好嬲豬鬧佢根本唔識區議會事務，但又隨便咁批評佢哋，所以發言要求劉小麗向十八區區議員道歉！

　　講起區議會職能，Edward喺今日立法會亦都提出個「強化區議會的角色及職能」議員議案，希望設立社區建設基金，加快落實區議會通過的社區設施項目，唔使下下都等啲連議事程序同議員職權範圍喺邊都唔知嘅人，凡事都「拉布」反對，令區議會被立法會連累。