立法會醫學界議員陳沛然
立法會醫學界議員陳沛然早早就表明自己嘅中立立場，鄭晴琴日就聽佢講，啱啱入立法會嗰陣，建制同泛民都拉佢入各自嘅whatsapp group，但個零月之後佢就同時退出咗，仲話係兩個電話一起撳，絕對冇話退咗邊個group先。唔知陳議員因為係咪時常感到「左右」為難呢？醫改條例喺上屆立法會「拉布」中，終未獲通過，早前政府成立「三方平台」並進行咗第一次會議。對於會議進展，陳議員得係簡單形容「氣氛一般」，就冇更詳盡嘅解釋，係咪又係「左右」為難，有苦說不出呢？
相信大家都好好奇，呢位醫生議員走馬上任後嘅生活係點？佢感慨，做議員仲難過專科考試，專科考試得係需要睇翻近兩年發生嘅嘢，但係好似依家急診室收費話要由100蚊加到220蚊，佢總要做功課睇翻十幾年之前嘅文件添！好彩日日仲可以瞓到六七粒鐘，不過以前一個月仲有時間同朋友踢下波，依家呢d時間都貢獻晒畀立法會。
