圖：我……我……唔睇網點識「馬首是瞻」喎\設計對白
公民黨立法會議員譚文豪早前喺大會發言嗰陣，誤將「馬首是瞻」讀錯做「馬首是『膽』」，旋即成為網民恥笑對象。
尋日立法會內務委員會開會，就調查特首梁振英UGL事件嘅專責委員會成立籌備小組委員會。由於有13位議員有意加入籌委會，多過上星期內會提出嘅11人，建制派就要求投票選出成員。有份報名嘅長毛就借題發揮，話建制派唔想佢入到籌委會，仲想將自己上次出席房屋同發展事務委員會聯席會議上，搶走發展局副局長馬紹祥嘅文件夾一事嚟講添，不過佢就扮唔記得馬副局長叫咩名。
呢個時候，民建聯何俊賢即刻「溫馨提示」，大叫：「馬首是『膽』啊！」點知長毛唔明個「笑點」，仲笑何俊賢讀錯字：「讀嚇書得唔得啊！」到投票表決嗰陣，「躺着也中槍」嘅譚文豪就行埋去長毛身邊「咬耳仔」，似乎係向佢講返個「典故」。長毛就尷尷尬尬咁話：「我唔睇網（網上資訊）㗎。」
