議會暴力時有發生，不論係立法會大會定係財委會會議，都試過有反對派議員因為違反議事規則而被趕離場。不過，呢種歪風而家已經蔓延到事務委員會喇。話說尋日立法會發展事務委員會同房屋事務委員會舉行聯席會議，討論橫洲發展問題。社民連梁國雄（長毛）藉口發展局副局長馬紹祥未有帶足夠文件開會，居然行去搶走馬紹祥嘅文件夾。
有份參與橫洲規劃嘅工程顧問公司奧雅納涉嫌挪用政府資料，引起議員關注，要求政府提供顧問公司就事件嘅書信來往，但係馬紹祥尋日無帶相關文件開會。長毛竟然走去馬紹祥面前，拎走對方嘅文件夾，聲稱要睇下馬紹祥係咪真係無帶喎。主持會議嘅麥美娟起初勸長毛「唔好搶嘢」、「請你坐返埋位」，連同場嘅運輸及房屋局局長張炳良亦幫口，話「佢（馬紹祥）可能真係無帶嚟嘛」。
不過，長毛一於少理，仲將個文件夾交咗畀朱凱迪睇添。麥美娟見警告無效，唯有將長毛趕離會議室，並暫停會議。其實而家立法會已經畀市民覺得無曬秩序，希望反對派跟進事件果陣都能夠守規矩，唔好再用呢啲方式擾亂會議進行啦。
