大公網11月10日訊 蕭生好嘢！多謝蕭生！特朗普喺今次美國總統選舉贏咗，可能真係要多謝蕭若元。點解咁講呢？網民發現，蕭若元早前不斷估希拉里會贏，但事實相反，再次印證咗佢「燈神」嘅實力。網民於是逐一列舉蕭生嘅威水往蹟，例如退聯必定失敗、佔中之後唔會有大型抗爭、英國留歐等等，睇完真係不禁要講返句「蕭生好嘢！」今年七月嗰陣，蕭生仲話好老定咁話，「有邊個識得我嘅，可以拎嚟同我賭。我係準備十萬蚊嘅，係一蚊賠兩蚊，如果Donald Trump(特朗普)贏嘅話。」嘩嘩嘩，蕭生記得找數呀！
股壇就有「丁蟹效應」，政壇就有「蕭生好嘢」。網民Leo Tam話：「次次估錯係實力」另一網民Sam Wong就話：「燒山英明」不過最好笑就係外號「無敵神駒」嘅仇思達，佢話聖誕節就到，建議蕭生個網台節目唔好叫「最新蕭析」，「更名為《最新燈飾》，更加貼近現實。」呢句真係好過癮。
