青年新政梁頌恆同游蕙禎上月喺立法會「宣獨」兼以「支那」侮辱全球華人，引起公憤。主要教育團體都予以譴責，唯獨作為全港最大教師公會嘅教協，一直都無公開表態。
《大公報》手足鍥而不捨，不斷聯絡教協會長、副會長以至理事，得到嘅答案係副會長兼立法會教育界議員葉建源毫不憤怒嘅回應：對梁游侮辱言論「感到非常遺憾，亦不可接受」。經過多番追問，葉建源先話，其言論係代表教協。
葉建源尋日舉行記者會，被問到梁游宣誓風波，除咗重彈「遺憾，不可接受」嘅舊調外，勉強再加一句，認為梁游兩人應睇到自己嘅錯誤，並為自己嘅不當行為承擔責任。
不過，教協另一位副會長張銳輝就話，議員喺宣誓時「若用上冒犯性言辭則未必太恰當」，仍未敢對梁游粗言、辱華行徑予以譴責。鄭晴不禁問教協，難道怕了梁頌恆、游蕙禎？
