對於梁頌恆、游蕙禎前日嘅暴力衝擊人神共憤，民主黨立即割席，公民黨郭榮鏗同其他專業議政嘅「泛民」功能組別議員，對於暴力行為嘅態度就好曖昧，只是送咗個生果籃慰問立法會保安組。鄭晴留意到，公民黨前日嘅聲明係咁講嘅：「對於今日立法會會議室外衝擊，導致有立法會職員受傷，公民黨表示遺憾」。嘩，咁嚴重嘅衝擊，六個保安要送院治理，只係講句遺憾？
而且聲明後文已轉移視線，將矛頭指向立法會主席梁君彥，話佢必須為亂局負全責，要求梁君彥要為梁、游盡快宣誓喎！睇返成篇聲明，一句所謂批評嘅說話只有呢句「但以暴易暴不見得更能彰顯公義，卻或會傷及無辜。」勉強嚟講，只係叫勸喻，絕對唔係譴責或批評囉！聲明仲話，公民黨雖然唔贊成梁、游言行，但絕對捍衛憲制賦予所有議員的權利。
鄭晴睇完只有一個感覺，就是訟棍黨「本色」─為反而反，顛倒是非黑白。明明係梁游唔聽主席命令離開，夾硬闖入嚟搞成今日局面，居然話主席造成亂局，呢個世界仲有公義？保安受傷，只係送果籃慰問，但無視衝擊暴力，公民黨真係假惺惺囉！
