梁頌恆、游蕙禎前日暴力衝擊立法會會議室，搞到六位保安受傷送院，身為「泛民」大黨嘅民主黨就光速割席，批評有關做法，又話宣誓風波由佢兩個一手造成，佢哋要承擔後果喎。唔知民主黨係咪仲好勞氣，尋日塗謹申出席電台節目嗰陣，繼續鬧「青政」，佢話「青政」兩人行為完全無顧及其他人安全，仲同十幾個助理，「一二三，衝！一二三，衝！」當時嘅力度係十分大，令到保安受傷。
阿塗愈講愈激氣，話梁、游從來都唔會坐低同其他「泛民」議員傾，只係試過到場「通知」有關行動嘅部署，而唔係同「泛民」討論，所以感到佢兩個好討厭「泛民」，尤其係民主黨。老實講，阿塗唔係真係咁傻豬啊？而家先知「青政」討厭「泛民」、討厭民主黨？一早就唔應該包庇佢兩個啦！佢哋由始至終都係利用「泛民」，如果唔係搞到咁大鑊，梁、游唔會理「泛民」啦！大愛喎！包容喎！嘥氣啦！「青政」咪有事「泛民」，無事鬆人。歸根究柢，如果唔係民主黨、唔係「泛民」支持「佔中」，支持破壞法治行動，就真係唔會搞成咁囉！
