大公網11月3日訊對於梁頌恆、游蕙禎尋日嘅暴力衝擊，民主黨立即割蓆，但公民黨只係輕輕帶過。公民黨郭榮鏗同其他專業議政嘅泛民功能組別議員，尋日就送咗生果籃慰問立法會保安組，但對於暴力行為嘅態度就好曖昧。公民黨尋日嘅聲明指，「對於今日立法會會議室外的衝擊，導致有立法會職員受傷，公民黨表示遺憾」嘩，咁嚴重嘅衝擊，六個保安要送院治理，只係講句遺憾?
之後聲明就將矛頭指向立法會主席梁君彥，話佢必須為亂局須全責，要求梁君彥要為梁、游誓快宣誓喎！睇返成篇聲明，一句所謂批評嘅說話只有呢句「但以暴易暴不見得更能彰顯公義，卻或會傷及無辜。」勉強嚟講，只係叫勸喻，絕對唔係譴責或批評囉！聲明仲話，公民黨雖然唔贊成梁、游言行，但絕對捍衛憲制賦予所有議員的權利。睇完聲明，公民黨依然都係為反而反，顛倒是非黑白。明明係梁游唔聽主席命令離開，佢地夾硬闖入嚟，搞成今日局面，居然話主席造成亂局，呢個世界仲有公義嗎?保安受傷，只係送花籃慰問，但無視衝擊暴力，公民黨真係假惺惺囉！
