大公網11月3日訊 梁頌恆、游蕙禎尋日暴力衝擊立法會會議室，搞到六位保安受傷送院，作為「泛民」大黨嘅民主黨就光速割蓆，批評有關做法，又話宣誓風波由佢兩個一手造成，佢哋要承擔後果喎。唔知民主黨係咪仲好勞氣，今日塗謹申出席電台節目嗰陣，繼續鬧青政，佢話青政兩人行為完全無顧及其他人安全，仲同十幾個助理，「一二三，衝！一二三，衝！」當時嘅力度係十分大，令到保安受傷。
阿塗就越講越激氣，話梁、游從來都唔會坐低同其他泛民議員傾，只係試過到場「通知」泛民有關行動嘅部署，而唔係同泛民討論，所以感到佢兩個好討厭泛民，尤其係民主黨。老實講，阿塗唔係真係咁傻豬呀?而家先知青政討厭泛民?而家先知佢哋討厭民主黨?一早就唔應該包庇佢兩個啦！佢哋由始至終都係利用泛民，如果唔係搞到咁大穫，梁、游唔會理泛民啦！大愛喎！包容喎！嘥氣啦！青政咪有事泛民，無事鬆人。歸根究底，如果唔係民主黨呀，泛民呀支持佔中，支持呢啲破壞法治嘅行動，就真係唔會搞成咁囉！
