圖：保安都係履行職責，令會議有秩序咁進行啫，畀人夾到面容扭曲，仲要畀人罵，真係辛苦你哋\大公報記者林良堅攝
立法會果然真係「沒有最亂，只有更亂！」青年新政梁頌恆同埋游蕙禎尋日將「行動」升級，帶埋成班議員助理一齊衝擊保安人員嘅防線，其中一名助理仲要係初一旺角暴亂嘅「禍首」、本土民主前線嘅黃台仰！對峙期間，班助理真係「手口並用」，猛咁出言挑釁、爆粗問候保安人員之餘，仲將街頭嘅暴力衝擊搬嚟立法會，搞到有六個保安要送院，鄭晴睇到都好激氣。
而游蕙禎同班助理「走在最前」，佢嘅助理就不斷兇現場嘅男保安，叫佢哋隻手唔好亂咁放，因住告佢哋非禮；之後仲話要拉一位女保安出嚟，「協助」佢離開。或者係因為太緊張嘅關係啦，女保安口快快講咗句：「我係保護緊游小姐個胸。」班助理即刻大鬧：「唔使你保護啊！」、「你要保護個胸就唔好做保安啦！做肚兜啦！」其實保安都係履行職責，令會議有秩序咁進行啫，班助理衝破唔到防線就「出口術」鬧到人狗血淋頭。呢啲唔係叫「勇武」，呢啲叫「小學雞」！
