圖：梁繼昌手指指罵張華峰，之後仲無喇喇跌低插水\大公報攝
梁頌恆、游蕙禎尋日硬闖會議廳，游蕙禎自己帶埋私家咪走去宣誓，之後梁、游兩個當然被主席趕離場喇！不過保安帶走梁頌恆期間，梁頌恆賴死唔走，喺經民聯張華峰（肥老闆）座位附近不斷糾纏，其間梁頌恆同肥老闆互相爆出「X街」等粗口，而梁繼昌又加入戰團，之後突然跌低。到底發生咩事呢？
肥老闆後來出嚟解畫，就話梁當時夾硬衝入嚟宣誓，但梁頌恆無依照大主席命令離開，反而喺佢面前不斷叫囂。肥老闆又話，咁樣會影響佢開會情緒，又推到佢張枱郁埋，連杯蓋都無咗，所以就呼籲梁頌恆唔好阻住開會。點知梁頌恆第一句就叫佢「X街」，佢就話好無可奈何，「一個人一定會有自然反應，我梗係回應佢嘅，重複嗰句。」肥老闆承認，身為議員，自己係衝動咗啲，以後會自己克制。
至於肥老闆同梁繼昌爭執期間，梁繼昌無端跌低，肥老闆就話，當時有拍過對方手臂，但同佢有一米距離，而佢又立即「瞓低」，「呢啲渾水都抽埋」。鄭晴翻睇其他媒體片段，當時肥老闆只係掂到梁繼昌嘅前臂，梁就立即「插水」。事後起身仲笑笑口，又同記者講話自己有「練嘢」，為免張老闆跌低所以自己先跌低喎！嘩，抽水過頭，啲演技真係好差囉！
