圖：黃台仰喺台灣「休養生息」咗十幾日，尋日喺立會露面\大公報記者何嘉駿攝
青年新政游梁宣誓風波鬧足大半個月，「港獨」分子四面楚歌，睇怕再玩唔出什麼花樣，不過游、梁背後嘅話事人本土民主前線黃台仰似乎仍未心息，近日不斷煽動「港獨台獨合流」，仲話今後要將活動重心轉移到台灣，實行「港獨」「台獨化」，真係唔知好嬲定好笑！
黃台仰前晚於自己網台Channel-i節目講，近日去台灣「休養生息」咗十幾日好有價值，「連結咗唔少盟友，做咗唔少工作，對於香港未來嘅獨立運動相信有作用」，話到台灣係要尋求「港獨」嘅論述基礎，搵咗好多台灣學者，「因為香港學者全部都係廢嘅」，仲預告未來「港獨」發展及培育人才，工作已經進行緊，「部署唔會喺香港境內」。既然佢咁講，鄭晴當然會繼續同大家密切跟進，睇下呢班「獨」人究竟如何勾引他人來「獨害」香港。
