圖：「梁議員」當街被人圍罵，大大聲兇番路過嘅途人，群情洶湧下，最後轉身敗走，高舉中指作「粗口手勢」回敬市民\網絡影片截圖

　　青年新政梁頌恆同游蕙禎呢對「獨鴛鴦」喺宣誓時講粗口，仲將「China」讀成辱華字眼「支那」，令好多市民感到神憎鬼厭，唔少網民都上網發聲鬧爆佢哋。鄭晴尋日收到一條網上瘋傳影片，一位勇敢嘅大媽喺街見到梁頌恆，隨即「以牙還牙」，喝停梁頌恆仲大鬧佢「支那」。不過未知衰嘅梁頌恆最後就「發老脾」，粗口橫飛鬧番人轉頭，仲疑似舉高中指掉頭走添。

　　大大聲兇途人

　　片段入面，揸機嘅嗰位女士緊隨梁頌恆，向佢大嗌多聲「支那」、「支那仔」，梁頌恆隨即停低，拎埋部手機出嚟反拍番人。觀乎梁頌恆近日嘅言行實在太過分，陸續有好多途人睇唔過眼加入戰團，大鬧梁「話我哋中國支那，你係走狗漢奸」。

　　平日意氣風發嘅「梁議員」眼見自己當街被人圍罵，仲死不悔改咁還擊，大大聲兇番路過嘅途人，仲差啲同在場人士發生肢體碰撞。不過可能見群情洶湧，驚自己寡不敵眾，他最後轉身敗走，卻就疑似高舉中指作「粗口手勢」回敬市民，以為自己咁樣可以攞番個彩。

　　有網民尋日將片段post喺梁頌恆Facebook，仲叫佢「以後不要再話你自己代表香港，短片就是街坊鄰居對你的回敬！」好明顯，香港市民對梁、游嘅不滿情緒已經到達頂點，鄭晴就覺得，佢哋應該聽下民意，唔好成日自我感覺良好以為好多人撐你，都係嗰句，道歉下台，以息民憤啦。