圖：張國鈞同大小喬，大家估唔估到右邊係邊一個呢 facebook截圖
唔知尋晚萬聖節係咪全街都係Harley Quinn呢？不過呢，凡事都有例外嘅。民建聯立法會議員張國鈞（Horace）前晚喺facebook發表咗一條短片，就係Horace兩個寶貝女大喬、小喬，同一班民建聯議員玩Trick or treat。大喬、小喬就披上橙色披風、戴住黑色同紫色嘅帽，好可愛咁跟住Horace周圍行。第一個就係遇到周浩鼎（Holden），不過Holden就話無糖，惟有接受「懲罰」啦！就係帶住副玩具眼鏡同埋小丑鼻。大小喬見到Holden嘅得意打扮，仲笑得好開心添！跟住第二個就係陳恒鑌（阿Ben），不過佢同樣係無糖，要接受「懲罰」。
之後大小喬就見到蔣麗芸（Ann姐）啦！佢哋跟住Ann姐跑入辦公室，今次終於有收穫喇！Ann姐仲要求大小喬畀個飛吻佢添！話口未完，民記主席李慧琼（Starry）就好神秘咁入咗嚟，送咗啲糖畀大小喬。最後一站，佢哋就去咗搵陳克勤，點之克勤又話無糖。不過，驚喜在後頭，克勤無喇喇攞咗個大南瓜氣球出嚟，氹到大小喬相當開心呢！
Horace最後就叫大小喬唔好咁快食曬啲糖，因住蛀牙啊！
