特首選委會選戰即將開鑼，反對派企圖搶攻各界別嘅選委議席。不過，一直以「專業」法律界人士自居嘅「法政匯思」任建峰近日竟然宣布，唔會循法律界參選，改為參選向來以「抽籤」形式決定10名選委嘅天主教界別。
任建峰早前曾經公開批評過，天主教界別選委係小圈子抽籤制度，仲話十分反對添。但近日又突然間「打倒昨日的我」，話已經向天主教教區交齊文件報名參選，仲已經獲教區確認資格，又要鬧又要參選，媽啊！鄭晴好亂啊！任建峰就撰文死撐，話支持寸土必爭，參加唔等於認同雲雲，又話如果天主教徒對民主有堅持，不計較「聖潔」，請踴躍參與天主教界嘅選委會抽籤過程咁話。不過，鄭晴就覺得，任建峰唔參選法律界，可能係未拎到足夠嘅法律界人士支持，未必搶到法律選委一席。唔通就係因為咁改變計劃？覺得「抽籤」碰運氣入到選委機會大啲？
另外，早前選擇同青年新政一眾「小學雞」分手嘅九龍城區議員鄺葆賢，就選擇參選醫學界選委，鄺葆賢仲聲稱話想帶出醫學界嘅民意。鄭晴知道，查實醫學界不嬲都鍾意理性、中立形象嘅「同路人」，「青政」一班搞事分子就一定唔係醫生們杯茶，唔知鄺醫生早前撇底黨友單飛，係咪想為自己選醫學界選委鋪路呢？
