圖：「小麗老師」喺台上被一名男子嘅波鞋掟中，佢仲話：「呢個係襲擊！」\大公報記者何嘉駿攝

　　候任立法會議員劉小麗尋日「不幸中招」，出席《城市論壇》時畀台下一名頭戴深藍色帽子、身穿藍色衫褲男子嘅波鞋掟中。「小麗老師」即刻喺台上大叫：「呢個係襲擊！」佢之後報警處理。警方就將案件列作普通襲擊處理，交由東區警區重案組跟進，暫時無人被捕。

　　劉小麗節目後借勢向記者展示「傷勢」，呻自己手臂同心口無故被隻鞋掟中咗，仲形容嗰隻鞋「係相當猛烈的一個襲擊」，佢仲要上救護車送院驗傷添。劉小麗還同記者話，施襲者係「保衛香港運動」嘅人。一位保衛香港運動成員就於論壇上即刻澄清，此人不是該組織成員，他們反對暴力，認為對掟鞋嘅人要嚴懲。

　　為人師表竟亂屈特首

　　而劉小麗尋日喺論壇上就老屈特首梁振英係「港獨」嘅幕後黑手。不過佢言論旋即被身為前民政事務局局長嘅「反辱華反港獨」大聯盟副召集人藍鴻震（藍爺）鬧爆，斥劉小麗身為老師，「竟然可以一啲證據都無就亂咁講」。藍爺話，在港英時代都有人提「港獨」，當時港英政府已表明「港獨」「It doesn't work, forget it」，重申「港獨」不可行。藍爺仲話，今屆立會選舉首次見到有候選人高舉「港獨」議題，感嘆「港獨」問題愈來愈嚴重。