文| 鄭晴

　　各位手足！夠鐘「攞軍糧」啦！講緊嘅係「女神」歐鎧淳（淳BB）啊！鄭晴見到佢日前影咗輯靚相，仲展現馬甲線。除咗淳BB，呢輯相入邊個個都入型入格，佢哋仲有同淳BB一起登上奧運舞台嘅香港女子游泳接力隊隊友江忞懿、鄭莉梅、施幸余，以及出戰里奧嘅女子背泳代表劉彥恩同埋「男飛魚」謝旻樹，大家為宣傳維港泳真係出力啊。港隊「飛魚」仲會同慈善組別賽事，鼓勵大家將愛心化為行動。

　　淳BB之前喺instagram透露過呢排無練水，但就成日要出event同拍嘢，早出晚歸，打亂生活規律。雖則係咁，睇返輯相，佢就仍然keep住至fit狀態，真係令人羨慕，鄭晴飲啖水都肥啊。

　　查實呢，淳BB早在拍攝呢輯靚相時，就講到自己細個游水有個小秘密，佢話，細細個游水就會喺水入面唱歌，不過而家大個咗，就會專注自己每一個動作，皆因每下動作都好重要。

　　對於第一次玩維港泳，佢就話無太大目標，最緊要享受過程，仲話自己唔慣游渡海泳，所以都有啲驚，但相信到時同大家一齊游會好開心。今年新世界維港泳會喺下月16日上晝八點半開始，由鯉魚門三家村公眾碼頭游到鰂魚涌公園公眾碼頭，賽事全長1.5公里。不過大家千祈唔好想喺維港「野生捕獲」淳BB，事關參加渡海泳必須要先通過測試。鄭晴就會乖乖喺岸邊幫「飛魚」們打氣啦！