圖：320名善信參加黃大仙師寶誕\大公報記者郭艷媚攝
唔講唔知，黃大仙今年已經1688歲喇，為咗慶祝佢嘅壽辰，嗇色園九十五年來第一次開放畀市民大眾參加「黃大仙師寶誕參禮」，鄭晴昨日都有去湊熱鬧。烈日當空之下，100個着住紅色袍的道長和320名善信來祝賀。幾百人一起唱生日歌？唔係，係唱一些導人向善嘅「孝悌忠仁義廉恥禮節信」經文祝壽，大家足足唱咗半個鐘頭，之後還要上香、三跪九叩、獻花果酒、獻壽包，飲米酒。道長話，黃大仙信俗屬非物質文化遺產項目，身為弟子有責任傳承呢種咁優秀嘅中國文化。
有個79歲嘅阿伯就同鄭晴抱怨，太太乜事都搵黃大仙幫手，就好似前年個仔結婚，老婆都要過來玩扔聖杯摘吉日；阿婆就馬上搭嘴，話今年同黃大仙零距離接觸，應該更加靈驗，話口未完就走咗去求籤。
