負責推動環境衛生嘅清潔龍「阿德」尋日就首次公開現身，陪同食物及衛生局局長高永文一齊見傳媒，要推動香港環境衛生，就靠曬你喇！
清潔龍「阿德」出場非常有氣勢，「阿德」仲同高醫生「擊掌」（圖），要將香港搞到乾乾淨淨，非常有決心咁話。唔知係咪「阿德」嘅氣場太勁，搞到局長講講嚇嘢都有兩聲咳，記者會都要暫停幾分鐘，但唔使擔心，原來係局長先前開會講得太多嘢，口乾有兩聲咳啫，不過見局長飲水都要拎住隻迷你版「阿德」，就知佢哋「Friend過打band」喇。
