藍色嘅外貌個殼三尖八角，唔講鄭晴仲以為係現代蒙古包，究竟係咩嚟呢？原來係首架港產「概念電動車」（圖）出爐，尋日仲喺科學園展示，呢架車就犀利啦，集合九隊隊伍嘅研發技術嚟製造。科技園行政總裁黃克強仲話，年底會同一間巴士公司合作推出自動駕駛巴士，希望促進智能移動技術的發展。
科學園早前舉行「EVTech Makerthon」，以電動車技術為主題的公開活動，九隊隊伍齊齊各司其職砌咗架「概念電動車」出嚟。話明係「概念」，架車同普通私家車完全唔同，駕駛者仲可以喺車入面玩瑜伽添。呢架電動車會喺下月香港首個大型賽車活動「電動方程式」（Formula E Hong Kong ePrix）期間開放予公眾參觀。
有份參與嘅城大電子工程學系研究助理黃子旭，佢哋團隊研發咗「智能電動車電池監測及診斷系統」，可以監測同診斷電動車電池的穩定以及可靠性，仲可以畀用家睇埋「電量狀態」同埋「健康狀態」，話埋畀你知粒電幾時會死，淥完個杯麵，系統就測試完，認真快手。
