圖：劉鳴煒化身夜魔石獸（圓圖）。而盛智文一眼就畀人認出，同市民一齊玩自拍

　　每年十月萬聖節，鄭晴好期待去海洋公園哈囉喂癲番轉。話說海園即將推出新活動「我要做嘩鬼」訓練營，畀遊客一償心願，化身嘩鬼嚇遊客。海園副主席「男神」劉鳴煒日前為咗推廣活動，仲同一眾管理層打扮成嘩鬼，率先同遊客打個招呼。有邊個見過「男神」？我見過！鄭晴我真係見過！

　　海洋公園哈囉喂出名得人驚，鄭晴每年入去都畀班嘩鬼嚇到「個心離一離呀！」直至今年海洋公園推出「我要做嘩鬼」訓練營，仲喺星期日邀請傳媒率先體驗，鄭晴終於有機會調轉角色，試嚇扮鬼扮馬。

　　嗰晚，海洋公園主席孔令成化身成為冥界大將軍，氣派十足；「男神」副主席劉鳴煒就扮成夜魔石獸，一身「灰Look」登場；而大樹灣發展項目籌劃小組榮譽顧問盛智文，同埋營業及市務執行總監李玲鳳，分別扮演猛鬼獵人同甜心骷髏女王，華麗得嚟又盞鬼。大熱天時，佢哋帶住記者朋友登場，貴為海園「生招牌」嘅盛智文當然一眼就畀人認出，而「男神」劉鳴煒當然都唔輸蝕，雖然化妝化到成塊面灰色，但都畀遊客迅速識穿，仲捉住狂影唔嬲。

　　嘩鬼訓練營將會喺下個月指定九個日子舉辦，每日名額廿個，即日起接受網上報名，每位收費盛惠「魔鬼價」666元。參加者首先要上堂學習專業「嘩鬼訓練」，包括學習安全指引、分析鬼怪性格、表演技巧等等，然後可以到猛鬼化妝間，換上鬼怪裝束，同埋化個鬼妝，靚仔定驚嚇，悉隨尊便。之後就會安排到海濱樂園，進行兩次大約15分鐘嘅演出，玩餐飽。已經玩咗兩年嘅「男神」劉鳴煒透露，今年仲會玩多幾次，難怪主席孔令成「硬銷」時講笑，想睇「男神」嘅話，一定要報名！