今屆立法會曲終人散，有人歡喜有人愁。自由黨榮譽主席田北俊尋日接受立法會主席曾鈺成嘅商台節目訪問，就被曾主席問到離開議會開唔開心，點知田少即刻答「梗係開心啦」，原來佢係見到新一屆立法會係換咗一班「更惡」嘅議員，覺得坐喺議會真係有排煩。曾主席聽到都忍唔住笑出嚟，仲話早排同朋友傾偈，佢都覺得唔繼續再競選連任，可能係一生人中「最明智嘅決定」。鄭晴聽到兩位資深議員咁講笑，心中有種想笑但笑唔出嘅感覺，皆因未來四年立法會，真係好有可能繼續被激進嘅議員騎劫，如果行政立法關係繼續惡化，乜嘢實事都做唔到，笑唔出嘅又豈止鄭晴一個。
