高調表明支持「港獨」嘅東九龍社區關注組陳澤滔，日前就舉行燒烤，同一班友人一齊迎接中秋，奇就奇在佢居然仲邀請埋話要舉報佢嘅愛港之聲主席高達斌。Gundam斌亦相當「勇武」，單刀赴會。陳澤滔仲同Gundam斌有講有笑，一路食一路傾偈，原來佢哋兩個咁friend，鄭晴真係估你唔到喎！不過一眾「本土派」因此震怒，覺得一個「獨派」支持者居然會邀請「藍絲」食嘢，仲要有講有笑有合照。
陳澤滔就喺facebook解釋，話Gundam斌無政治能量，唔認為需要驚佢啲乜，仲話Gundam斌會直說直話，「而其他人，我相信唔會講。」陳澤滔又聲稱，「坐低傾嘅，我都願意坐落嚟傾。我希望聽到嘅，唔係淨係一邊嘅語言。」不過，照鄭晴睇，以前就話「本土派」「圍爐取暖」，而家爐就圍完啦，有人仲變埋炭灰，唔知陳澤滔點諗呢？
