圖：喺公園長椅做「睡美太」嘅葉劉淑儀
話說新民黨主席葉劉淑儀同囡囡去咗歐洲旅行，遊完西班牙馬德里之後，就坐兩個鐘火車去西班牙南部的藝術之都西維爾（Seville），參觀歐洲第三大教堂塞維亞主教座堂等，順便沾染下藝術文化氣息。不過，唔知係咪太文藝呢，葉太就喺Facebook上載咗張相，只見佢戴起副超，擺到成個MJ Moon Walk（月步）姿勢咁，唔通諗住「躺着也跳舞」咁藝術？
非也，葉太呢個姿勢叫「海棠午睡」，之但係因咩事要搞到瞓街呀？原來係要跟上當地人嘅潮流！葉太話，siesta（午休）係西維爾居民習慣，所以當地餐廳只會喺中午一點到四點、夜晚八點到午夜12點營業，就連商店都會喺中午兩點至五點關門小休，一場嚟到梗係要「入鄉隨俗」，喺公園長椅做「睡美太」，瞓嚇晏覺啦。
葉太仲話，悠閒乃呢個城巿嘅生活特徵，所以有好多藝術家都鍾意喺度搵靈感，好似「西維爾的理髮師」及「卡門」等，故事背景都發生喺西維爾。西班牙雖然好玩，但係經常有偷竊事件發生，鄭晴勸葉太都要小心個人安全啦。
