圖：哈利電單車隊為慈善環島遊\大公報記者林少權攝
一支約60輛Harley-Davidson（哈利）電單車組成嘅車隊尋日朝早出現喺銅鑼灣，浩浩蕩蕩由保良局銅鑼灣總部出發，經過孫中山紀念公園、國際金融中心、香港摩天輪、皇后像廣場、添馬公園等，最終於中午到達終點站赤柱廣場。無啦啦有哈利車隊出巡？鄭晴當然有走去睇下發生咩事啦。原來呢次係慈善活動，目的係提醒大家幫助身邊有需要嘅人士。哈利騎士們亦解囊相助，每人捐出不少於500蚊善款畀保良局，用於為2歲至18歲嘅兒童，提供課本之外嘅兩文三語教學，希望小朋友有機會享有更好嘅教育。其中一位車手Benny話，佢玩電單車已經有廿年，近幾年來，佢哋每年都會有一次類似嘅慈善巡遊，好似喺大嶼山呼籲大家保護環境，但好似尋日咁大型嘅巡遊，真係第一次。鄭晴覺得呢班哈利騎士真係又有型心地又好，真係筍盤嚟，睇到鄭晴都心心眼。
