圖：Nigel與領犬員進行三星期訓練\影片截圖
舊年11月，啱啱出世一周嘅警犬兄妹Nigel和Nancy首次喺警察facebook專頁曝光，佢哋sell得意樣，成功「呃咗」好多like。時間過得真快，尋日鄭晴喺香港警察facebook專頁睇到Nigel和Nancy嘅最新短片，原來佢哋三個禮拜前已經進入沙嶺警犬隊總部接受「入職訓練」，成為「新紮師兄」同「新紮師妹」啦。
入咗學堂三個星期，唔知呢對警犬小兄妹有咩改變？Nigel嘅領犬員話，Nigel剛入學時比較細膽，仲有玩水盆嘅壞習慣，經常將水盆弄跌，搞到自己冇水飲。經過三星期嘅相處，雙方已建立咗互信，改變Nigel對人嘅警戒心，仲慢慢戒埋玩水盆嘅壞習慣。
負責照顧Nancy嘅領犬員佩兒話：「其實喺呢三星期中，Nancy嘅轉變幾大，一開始佢好文靜，但呢個星期開始好活潑，好鍾意玩。」佩兒已經將Nancy當係自己嘅屋企人咁，希望佢可以順利喺警犬隊訓練中畢業。
