圖：田北辰派月餅畀老人家
中秋係人月兩團圓嘅日子，唔少政界名人尋日都落區派愛心月餅，同街坊一齊歡度佳節。青年民建聯主席、觀塘區議員顏汶羽（Frankie）尋日就「突襲」牛頭角彩霞邨，向街坊派驚喜月餅。之不過，Frankie派嘅並唔係普通月餅，而係社企「銀杏館」自家製嘅愛心月餅。有咩咁特別？Frankie話，銀杏館唔只係社企，仲係好有心嘅社企，因為佢除咗一直為長者提供工作機會，仲對食物質素要求好高，所以好受歡迎。
另一邊廂，新民黨常務副主席田北辰亦派咗月餅畀公公婆婆，等佢哋開開心心咁過節。阿田話，都市人生活繁忙，好多時都將家庭拋諸腦後，而中秋節又稱「團圓節」，叫大家趁中秋「珍惜眼前人」。
係囉！再忙都要慶祝下，新民黨候任立法會議員容海恩（Eunice）就去到中秋晚會同居民玩遊戲。Eunice話，見到小朋友玩得咁開心，就諗起細個同家人過節嘅情景，一走出街就見到一家大細食月餅同埋玩燈籠。
