圖：顏汶羽向街坊派驚喜月餅
中秋佳節唔少人都會去賞月玩燈籠，不過就硬係有啲好鬼MK又跟唔上潮流嘅人點都要玩熒光棒。就連環境局嘅「甜心」大嘥鬼都睇唔過眼，尋日喺Facebook貼咗張「自拍照」，公開呼籲各位環保之友，「有月光就唔好玩熒光」，好似佢咁射到自己中毒之餘（下圖），仲污染環境就唔好啦。
大嘥鬼話，熒光棒唔單止無辦法回收，入面嘅化學物質仲會污染泥土同海水，好似中毒咁恐怖㗎！係囉，套大嘥鬼嘅話講：「其實有咁大咁正嘅月光，又使乜玩熒光棒喎！不如發揮嚇平時無乜用嘅小宇宙，用廢物整個獨一無二嘅燈籠仲好啦！」費事熒光光搞到地球心慌慌嘛。
此帖一出，網民都紛紛大讚大嘥鬼順應民意，唔玩熒光棒好抵錫咁話，仲獻計叫亞鬼出年開班教人DIY燈籠。
而大嘥鬼中秋佳節就梗係返去同星星局長食飯過節啦，佢回帖時仲好貼心咁叫人參加「綠在沙田／東區」活動，學下自製燈籠，再唔係玩LED光棒都得！鄭晴都喺度祝亞鬼同星星局長中秋節快樂，大家記得月餅唔好食太多，食得就唔好嘥，唔好做大嘥鬼呀！
