圖：曾德成（左）同大家追憶似水流年，分享後生時喺《大公報》做記者嘅點滴

　　上回講到，曾鈺成最近開咪做DJ，仲請埋胞弟、前民政事務局局長曾德成做嘉賓。德成尋日就同大家追憶似水流年，分享上世紀70年代後生時喺《大公報》做記者嘅日子。佢話，好多時都要流連尖沙咀火車站搵料，而德成亦因為講得一口流利英文，多次被委派去採訪國際事務，例如「乒乓外交」同鄧小平外訪等等歷史大事等等，更親身見證住中英關係嘅變化。

　　曾德成話嗰陣做記者，成日都要去尖沙咀火車站流連，訪問啱啱去完中國嘅人點睇中美關係、中國時局，當中包括「乒乓外交」時嘅美國球員。佢仲提起一則趣聞，話當年見到有個好出名嘅美國乒乓球員，不單止留長髮，仲着到成個「嬉皮士」咁，曾德成話：「嗰陣文革過後，人民思想仲好保守，絕對睇不慣佢哋一身牛仔造型、紮腳褲啦；不過周恩來總理竟然不以為然，仲話：『青年人有這樣的裝扮也不出奇，我年輕時亦會奇裝異服、標奇立異。』」真係走在潮流尖端呀！

　　曾德成又講到，喺北京翻查文件，得知1978年10月鄧小平出訪日本，當時小平坐新幹線由東京到京都，見識到外國發展水平，反思「一個人醜怎裝都冇用」。佢同鄭晴講，覺得鄧小平喺處理香港回歸問題嘅時候，已經同時思考緊中國未來嘅路，認為鄧小平容納香港行資本主義，吸引資本，「『一國兩制』同佢整個思想脗合。」