圖：Ann姐fb上載溫馨大合照
立法會選舉大戰當前，一眾候選人忙於落區同出席論壇，每日都係圍繞選舉工程更新facebook，睇得多真係有啲審美疲勞。但係出選九龍西並力爭連任的蔣麗芸（Ann姐），前日嘅facebook就令人眼前一亮，原來佢同蔣家嘅親朋戚友，齊齊為爸爸蔣震，慶祝93歲高壽，佢上載咗幾張大合照，留言話：「無論多忙，爸爸生日不能忘！」
蔣震係香港鼎鼎大名嘅工業家同慈善家，鄭晴見到佢喺相入面都好精神，仲同小朋友一齊跳舞添，真係好開心。其實蔣家嘅創業都好艱苦，佢哋一家九口好早之前住喺大磡村木屋區，艱苦歲月練就出二家姐蔣麗芸嘅真性情，同埋發奮向上嘅精神。介紹番，九龍西候選人名單仲有梁美芬、狄志遠、譚國僑、游蕙禎、黃碧雲、劉小麗、李泳漢、朱韶洪、黃毓民、何志光、關新偉、毛孟靜、吳文遠、林依麗。
