圖：傅園慧與市民揮手告別 大公報記者麥潤田攝
三日話咁快過去，國家奧運精英代表隊尋日轉到澳門訪問，相信大家同鄭晴一樣依依不捨。咁多位運動員中，傅園慧嘅真性情贏得大家喜愛，尋日NOW TV就播出佢嘅專訪，片中主持叫傅以廣東話介紹自己，佢即刻笑說「我哪懂那麼多」，然後佢再使出「洪荒之力」以半鹹半淡嘅廣東話，講「你好」、「得唔得」同「阿SIR」，但原來佢唔知「阿SIR」係點解……主持話佢知係警察時，佢即刻呆呆地O咀「哦！」，十分搞笑。
嚟咗香港三日，傅園慧收到好多粉絲送嘅毛公仔，令佢好開心，仲話「他們都是我的新寶寶」。佢再次感謝港人對佢嘅支持同愛護，但幸福同時亦搞到佢好煩惱，佢話喺街上畀好多人認出，冇以前咁自由。雖然近日爆紅，但佢話希望大家更關注佢賽場上嘅表現，又希望體育與政治可以分開。最後佢又畫一隻豬仔送畀男主持，仲話：「真兄弟，講義氣，打鈎勾」，唔知佢地有咩秘密呢？
