圖：譚校長（右）認為奧運精英係中國人的驕傲

　　奧運精英訪港，唔好話市民爭住要買飛睇表演，就連一班明星都要「追星」。見佢哋放上網嘅「集郵品」咁齊，鄭晴都好「葡萄」呀！

　　左麟化身大粉絲

　　呢幾日打開微博、facebook，幾乎全部係奧運精英消息，更加見到難得「天文現象」─明星追星。譚詠麟（譚校長）就喺微博話「今午有幸與他們（運動健兒）聚餐，令幾十年從沒做過粉絲的我變了……大粉；畢竟他們是我們中國人的驕傲嘛！」

　　除咗譚校長，當日到酒店迎接一眾健兒嘅仲有港區全國人大代表、愛國歌手張明敏。佢爭住同郎平合照，仲自備排球攞簽名，之後仲集齊全隊女排成員嘅簽名。當女排精神遇上「中國心」，真係激盪人心呢！

　　右李向世界恤髮

　　有「左麟」，當然唔少得「右李」。李克勤早兩日就喺禮賓府同一班世界級選手見面，出發前已經恤定髮啦，「扮靚靚，等陣要去禮賓府見金牌運動員，興奮！」完咗活動，佢仲上載咗差唔多十張相，「我自小便是運動迷，所以特別尊重運動員，國家隊的，香港隊的，有機會總是想多了解他們，甚至交個朋友。不要見我面上好像很鎮定，其實內心很激動呀！」

　　當日同場仲有「宇宙最強」甄子丹，佢仲話：奧運英雄的輝煌成績讓每個中國人都值得驕傲！話明「宇宙最強」，其中一張相就係同奧運跆拳道金牌得主趙帥及鄭姝音，握拳擺甫士合照，氣勢十足。不過，話口未完，另一張相甄子丹同傅園慧合照時，就唔覺意，一時唔小心，失手！被傅園慧打到個鼻呀！放心，係冇人受傷。事緣合照一刻「洪荒少女」剛剛舉高隻手，而隻手又喺正甄子丹鼻前，睇落仲以為武林高手甄子丹都畀人偷襲到添。

　　莫文蔚亦把握最後機會，前日同兩位「男神」孫楊、張繼科合照，仲話「歡迎兩位金牌偶像到香港#奧運代表團訪港#以後要常來啊」連個hashtag都順便宣傳埋香港，真係要畀個「讚」！