萬眾期待嘅國家奧運精英運動員訪港，不少市民及內地旅客仲專程到代表團下榻嘅酒店守候，望能一睹偶像風采，甚至希望得到一個合照、簽名的機會。
有喺海景嘉福酒店協助接待「精英團」嘅義工同鄭晴講，「超級丹」林丹返抵酒店後就立刻返房休息，連續兩日午宴都冇出現，所以好難「捕獲」到佢，搞到一班少女義工及粉絲好失望。但係尋日就有粉絲「捕獲」到換咗兔兔便服及戴住眼鏡嘅「跳水皇后」吳敏霞，佢亦來者不拒，與粉絲等拍照留念，親民形象不改。
而人氣爆燈嘅「洪荒少女」傅園慧尋日也被市民喺街頭「野生捕獲」，佢着住藍色T恤，紅色短褲，戴住cap帽，仲拎住有迪士尼圖案嘅膠袋。傅園慧今次無得去迪士尼，唔知係唔係又有粉絲送公仔畀佢呢？
