前年違法「佔中」前夕，曾經叫人衝入政府總部公民廣場嘅前學民思潮召集人黃之鋒（見圖），前日被裁定一項「參與非法集會」罪名成立，判處80小時社會服務令。佢尋日同同樣被裁定「參與非法集會」罪成、判處緩刑嘅前學聯秘書長周永康出席電台節目，重申大家都仲考慮緊▉會唔／會晤▉會就定罪提出上訴喎。
經常搞搞震嘅黃之鋒似乎冇因為今次被判刑而有所收斂，仲話會更有決心投入「公民抗命」，進行非暴力抗爭，真係令人費解。但最令人摸不着頭腦嘅係，當初同一眾反對派頭目積極參與「佔中」、拍曬心口話會承擔罪責嘅黃之鋒，喺舊年因組織及參與「佔中」而被警方「預約拘捕」嗰陣，已經「踢保」，依家雖然話尊重法庭裁決，但又想提出上訴，係咪又想再一次出爾反爾？
另一方面，黃之鋒又話，好開心同樣被判社會服務令嘅「香港眾志」主席羅冠聰能夠繼續參選立法會香港島選區。但就算有得選又點吖，睇下最新啲滾動民調結果，羅冠聰得嗰1%支持率，莫講話當選，連拎唔拎得番選舉按金都成問題。
香港島選區其他候選人仲有張國鈞、郭偉強、葉劉淑儀、許智峯、陳淑莊、何秀蘭、黃梓謙、鄭錦滿、司馬文、王維基、詹培忠、沈志超、徐子見，以及劉嘉鴻。
