圖：馬逢國從事文化界工作幾十年，見證住唔少「超級巨星」誕生，原來佢都曾經做過男主角/設計圖片

　　立法會體育、演藝、文化及出版界候選人馬逢國從事文化界工作幾十年，見證住唔少「超級巨星」誕生，前幾日更受到香港「詞壇巨匠」向雪懷邀請去睇佢嘅音樂會，馬生仲盛讚好友作品精彩、膾炙人口。但原來除咗睇騷，馬逢國年輕時都成日「搞事」，舉辦唔少大型文娛康樂活動，有次仲做埋舞台劇男主角，喺香港大會堂做咗場「大龍鳳」添，可謂香港文化界嘅「幕後功臣」。

　　馬逢國同鄭晴講，年輕時曾經喺理工大學搞「柬埔寨萬人音樂會」，幫柬埔寨難民籌款；佢仲參與好多本土電影製作，好似鮑起鳴嘅《爵士駕到》、《廟街皇后》等，就連好收得嘅《寒戰2》佢都有幫手，帶劇組入立法會拍攝。

　　重遇那些年女主角

　　不過，一直居於幕後嘅馬逢國原來30幾年前曾經「擔正」做男主角，劇目仲喺大會堂上演過。馬逢國話，其實係一套中古時期嘅西方舞台劇，當時製作人搵佢飾演一個失意將軍，因為貪佢把聲夠靚喎！劇情係咩？馬生話已經唔記得咗啦，不過就畀咗張同男配角嘅合照鄭晴睇，叫讀者唔好搞錯呀，右邊先係佢「真身」。佢仲話呢排竟然喺facebook重遇當時女主角，對方更主動問記唔記得佢，青澀回憶真係當堂返曬嚟！

　　搞到鄭晴都好想親眼目睹佢嘅演技添，咁▉會唔／會晤▉會得閒再客串下幕前呢？馬逢國就話，記對白同台詞係一個大考驗，不過如果有人邀請嘅話，會認真考慮客串下，重溫當年戲癮咁話！

　　體育、演藝、文化及出版界候選人還包括周博賢。