圖：葉劉貼文提出多個解決「三座大山」方案

　　領展、港鐵和強積金對沖呢三座「大山」，一直以來都壓到全港市民唞唔到氣。立法會港島區候選人、新民黨主席葉劉淑儀，日前就喺Facebook貼文提出多個解決方案，話要變魔術移走呢「三座大山」，仲親身留言回應網民提問。睇怕今次香港市民唔使搵愚公啦，一於搵「葉劉移山」搞掂佢！

　　葉太批評，僱主利用供款抵銷遣散費同長期服務金，即係變相沖走退休儲蓄；建議政府出資幫打工仔買「失業保險」，每年開支大約10億港元到啦，但就保障到打工仔利益。唔單止咁，對於好多打工仔投訴，坊間強積金基金數目太多，管理費又貴，真正「落袋」所剩無幾。葉太就希望改革強積金制度，長遠成立金額較大公積金，容許僱員供款自由行，減低管理費同提高回報率。

　　不過有網民就留言撐領展同港鐵，話佢哋平衡股東利益同社會責任上做得很好。葉太「現真身」回覆，話政府當年錯在將大量設施賣畀單一企業，等領展有機可乘，將商場翻新加租、停車場拆售，罔顧居民意願。她認為政府應引入競爭，好似物色地點起返啲公營街市，幫區內市民提供車位等，削弱領展權勢。

　　港鐵票價只加不減呢，葉太就建議喺唔改變而家營運模式同員工福利下，將港鐵變成一間由政府全資擁有嘅企業，令港鐵負上更大社會責任。她又建議，政府可考慮將港鐵本港業務同境外業務分拆，變成兩間公司，令兩個管理團隊專注手上工作。鄭晴見到個政綱咁堅決幫市民，睇來葉太真係出盡心思「移山」喎。

　　鄭晴提提你，港島區候選人名單仲有張國鈞、郭偉強、許智峯、陳淑莊、鄭錦滿、羅冠聰、司馬文、王維基、沈志超、詹培忠、徐子見、何秀蘭、劉嘉鴻及黃梓謙。