圖：容海恩話自己就唔太喜歡大大隻隻嘅男生，比較鍾意啲文縐縐喎 /大公報記者蔡文豪攝

　　講到睇奧運，唔少女仔都會特別留意啲男運動員，皆因佢哋當中好多「小鮮肉」嘛！不過，有「法律界桂綸鎂」之稱嘅新民黨容海恩（Eunice）就唔太喜歡喇，因為相比大大隻隻嘅男生，佢較鍾意啲文縐縐嘅，話大隻男唔多啱佢喎。至於Eunice鍾意睇奧運邊個項目？佢就話，自己多數睇游泳比賽，好似早前贏得100米背泳銅牌嘅國家游泳隊隊員傅園慧嘅賽後訪問片段，佢仲睇咗好多次添，話好難得有咁真性情嘅人，喺傳媒面前都唔介意顯示自己最真實嘅一面。唔知係咪呢個原因，Eunice都係經常向大家表現出佢最真實嘅一面呢？

　　電視機上面嘅大狀，多數都好似好Cool咁，不過鄭晴日前喺將軍澳附近見到Eunice同「將軍澳男神」當區區議員譚領律時，就見到Eunice親切嘅笑容，仲見到佢不時同沿路嘅街坊微笑揮手添。Eunice話，雖然做街站都幾辛苦，又因為要周圍走，以求爭取時間同市民接觸，所以無咩時間食飯，瘦咗10幾磅，但能夠為市民服務又可以同佢哋傾偈，就咩辛苦都唔記得曬，瘦身當排毒啦！

　　鄭晴提提你，已報名參選新界東有：葛珮帆、陳克勤、鄧家彪、容海恩、李梓敬、方國珊、林卓廷、楊岳橋、張超雄、范國威、侯志強、梁國雄、陳志全、麥嘉晉、廖添誠、黃琛喻、鄭家富，陳雲根、陳玉娥、李偲嫣、梁頌恆、梁金成。