民政事務局局長劉江華日前透露，特區政府正考慮，今年或一如以往咁，喺奧運會結束之後，邀請喺里約奧運贏得金牌嘅國家運動員嚟香港，同香港市民見下面。鄭晴聽到呢個消息，梗係超級開心啦！
邀請港運動員一齊慶祝
不過，消息人士話畀鄭晴知，由於奧運會仲未完，所以呢個活動預計會喺八月尾先舉行，詳情未落實，暫時無可奉告，只可以透露，除咗國家隊金牌運動員外，今年仲會特別邀請埋香港運動員出席，皆因本港選手喺今屆奧運會中，都攞到非常驕人嘅成績，所以一定要一齊慶祝一番喎。
至於一啲未取得奧運金牌，但又特別受港人歡迎嘅國家隊運動員，例如，早幾日使出「洪荒之力」贏得奧運女子100米背泳銅牌嘅「表情天后」傅園慧咁，會唔會一齊嚟香港呢？消息人士就同鄭晴講，話始終過往都係邀請金牌運動員嚟香港，所以其他安排都係要等到奧運結束後，先有決定喎。好似好神秘咁，不過，諗起國家隊運動員同香港隊運動員一齊示範佢哋體育專項嘅秘技畀廣大市民睇、與民同樂，真係要拍爛手掌啦！
