九月四日就係立法會選舉投票日，仲有唔夠一個月，候選人都各出奇招，吸引選民注意同埋爭取支持。其中，由勞工界轉戰港島區直選嘅工聯會立法會議員郭偉強（阿強），尋日喺佢競選團隊社交網站專頁上，出現咗一段好唔似阿強嘅宣傳片。阿強仲用勁chok嘅樣同好似朗誦緊咁嘅聲線，嚟宣傳佢嘅理念同政綱添，鄭晴都覺得幾新鮮下㗎！
喺片段中，阿強話，香港係我哋嘅家園，佢喺呢片土地上住咗38年，佢好愛、好愛香港。佢又話，近年香港所經歷嘅風風雨雨，令佢覺得呢度好需要正能量，只要呢度有正能量，所有事都會變得美好，就好似雨後彩虹咁喎。鄭晴提提你，港島區直選嘅候選名單仲有：張國鈞、葉劉淑儀、許智峯、陳淑莊、何秀蘭、黃梓謙、鄭錦滿、羅冠聰、司馬文、王維基、詹培忠、沈志超、徐子見及劉嘉鴻。
