圖：「謝偉俊百分百」第三集片段

　　講起競逐連任九龍東嘅立法會議員謝偉俊（Paul），除咗會記得佢深入民心嘅「律師超人」形象外，梗係仲有同佢形影不離嘅謝太白韻琹（白姐姐）啦。尋日，阿Paul嘅社交網站專頁就上載咗「謝偉俊百分百」第三集嘅片段，由阿Paul同白姐姐親自剖析兩人嘅相識經過，唔講唔知，當初幫佢哋牽紅線嘅人原來係資深大律師廖長城同馮華健添。

　　唔介意改姓白因為筆畫少

　　咁究竟係邊個追邊個呢？阿Paul同白姐姐就話，佢哋彼此都冇追過對方喎。至於佢哋欣賞對方啲乜呢？阿Paul就話鍾意白姐姐夠成熟，而白姐姐就講笑咁話鍾意阿Paul靚仔，不過講真嘅話就其實係欣賞阿Paul鍾意幫人，呢樣優點令白姐姐對阿Paul又愛又恨咁話。被問到男人最難答嘅問題，就係老婆同媽媽一齊跌落水，會救邊個先？阿Paul就好醒目咁即時讚白姐姐游水叻，係佢嘅滑水教練，所以自己應該會救阿媽先喎。之後佢哋又講到白姐姐年紀較阿Paul大嘅問題，阿Paul話唔明白點解啲人會介意女大男細，咁諗法係好落後，總之開心就得。阿Paul仲話唔介意改姓白添，因為筆畫少啲，排位置都前啲咁話，認真幽默。

　　鄭晴提提你，立法會九龍東候選名單仲有：柯創盛、黃國健、譚文豪、胡志偉、陳澤滔、胡穗珊、譚香文、譚得志、黃洋達、高達斌及呂永基。